गायक पशुपति शर्मा अब क्रिकेट खेलाडी बन्ने

मोडेल खेले मोडेलमा फिट भईन
दोहोरी मात्रै गाएर हिट भई.....
म पनि अब क्रिकेट खेल्न जान्छु
नाम पनि हुने, दाम पनि हुने,
च्याप्प लौरो समात्छु चौका छक्का हान्छु

पशुपति शर्माको नयाँ गीत हो यो । उटपट्याङ गीत गराउन माहिर शर्माले नेपालमा क्रिकेटको लहर आएका बेला यस्तो गीत बनाएका छन् । ‘मलाई अमेरिका यही’ गीतले छुट्टै उचाई गराएका पशुपति शर्माले यो गीतबाट पनि यस्तै आशा राखेका छन् ।

शर्माले भने ‘झट्ट सुन्दा ठट्यौली जस्तो लाग्छ तर धेरै सन्देशमूलक बनेको छ गीत ।’  गीतमा पशुपतिले क्रिकेट खेल्न नजान्ने रहर मात्रै गरेको युवाको प्रतिनिधित्व गरेका छन् । उनलाई गीतमै सम्झाएका छन् अर्का गायक रमेशराज भट्टराईले । शर्मा र भट्टराई दोहोरीका पुरानै दौतरी हुन् । लोक तथा आधुनिक गीतका गायक, संगीतकार रहेका रमेशराजले यो गीतबाट बेग्लै आशा गरेको बताए ।

उनले भने, आशाबादी छु, यो गीतले केही गर्नेछ ।  आफ्नो आधुनिक गीत बबाल भोबाट चर्चामा रहेकै बेला पशुपतिको नयाँ गीतले दर्शक स्रोतामा छुट्टै पहिचान गराउने आशामा छन् भट्टराई । मालश्री रेकर्डिङ स्टुडियोमा रेकर्ड भईरहेको गीतको बजार प्रबद्र्धन आशिष म्युजिकले गर्ने भएको छ भने पछिल्लो समय म्युजिक भिडियो निर्देशनतिर प्रवेश गरेका मेरी बास्सैका निर्देशक सिताराम कट्टेल धुर्मुसले गीतको निर्देशन गर्ने भएका छन् ।